शहीद प्रकाश मोरे यांची कन्या अनुष्का मोरे यांना औषध निर्माता पदाची नियुक्ती
मुंबई, दि. ४ ऑक्टोबर —
२६ नोव्हेंबर २००८ रोजी मुंबईवरील दहशतवादी हल्ल्यात देशाच्या सुरक्षेसाठी शौर्याने लढत वीरमरण प्राप्त केलेले पोलीस उपनिरीक्षक शहीद स्व. प्रकाश पांडुरंग मोरे यांच्या कन्या अनुष्का प्रकाश मोरे यांना आज राज्य रोजगार मेळाव्यात अनुकंपा तत्वावर ‘औषध निर्माता (गट-ब)’ पदाचे नियुक्तीपत्र प्रदान करण्यात आले.
‘औषध निर्माता’ हे पद महाराष्ट्र लोकसेवा आयोगाच्या (MPSC) कार्यक्षेत्रात असल्यामुळे नियुक्तीत तांत्रिक अडचणी निर्माण झाल्या होत्या. मात्र, सातत्यपूर्ण पाठपुरावा आणि महाराष्ट्र लोकसेवा आयोगाच्या संवेदनशील भूमिकेमुळे ‘विशेष बाब’ म्हणून अनुष्का मोरे यांची नियुक्ती शक्य झाली.
शहीद वडिलांचे स्वप्न साकार करत, अनुष्का मोरे यांनी आपल्या धैर्य, जिद्द आणि कर्तव्यनिष्ठेच्या बळावर नव्या प्रवासाची सुरुवात केली आहे. हा क्षण केवळ मोरे कुटुंबासाठीच नव्हे, तर संपूर्ण महाराष्ट्रासाठी अभिमानाचा आणि प्रेरणादायी ठरला आहे.
