गोठ्यावर वीज कोसळून चार गायी, दोन वासरे जळून खाक
मुदखेड ता.प्र/पिराजी गाडेकर
मुदखेड तालुक्यातील मौजे डोंगरगाव येथील शेतकऱ्याच्या शेतातील गोठ्यावर वीज कोसळून चार गाई दोन वासरे अचानकपणे दगावल्याची दुर्दैवी घटना घडली असून त्या शेतकऱ्यांवर दुःखाचा डोंगर कोसळला आहे.या घटनेबद्दल सर्वत्र हळहळ व्यक्त करण्यात येत आहे.
दि. ७ सप्टेंबर रविवार रोजी सायंकाळी ८.३० सुमारास अचानक रिमझिम पाऊस सुरू झाला या पावसात डोंगरगाव येथील शेतकरी दिलीप दामोदर पा.व्यवहारे यांच्या शेतातील गोठ्यावर वीज कोसळली असून यात चार गायी व दोन वासरे दगावली आहेत, या घटनेत संपूर्ण गोठा जळून खाक झाला आहे.
या घटनेनंतर बारड परिसरातील अनेक पक्षाचे पदाधिकारी, पशुवैद्यकीय अधिकारी,शेतकरी यांनी घटनास्थळाकडे धाव घेतली असून शेतकरी दिलीप दामोदर पा.व्यवहारे यांच्या शेतातील गोठ्यावर झालेल्या दुर्दैवी घटनेबद्दल हळहळ व्यक्त होत आहे. सदरील घटना घडल्यानंतर तहसीलदार आनंद देऊळगावकर यांना माहिती देण्यात आलेली असून उद्या दि. ८ सप्टेंबर सोमवार रोजी घटनास्थळी भेट देऊन प्रशासनाकडून पंचनामा करण्यात येईल अशी माहिती दिली आहे.
